قصة مقتل ( يوسف الرشيدي )

من طرف admin الأربعاء يونيو 23, 2010 12:07 pm

قصة نقلتها منتديات ليبيا المجد من احدى المواقع
النهارده يا شباب جايبلكم وللأسف الشديد فديو قتل حصل عندنا فى المنطقه من حوالى اسبوعين وكنت بدور عالفيديو علشان أنزله هنا لكن الحمد لله الرجاله عملو الصح ونزلوه عاليوتيوب
بس قبل ما تشوفو الفيلم احب أعرفكم القصه زى ما عرفتها من صاحب القتيل والقاتل
أولآ القتيل اسمه / يوسف الرشيدى
أما القاتل فهو / على
الأتنين أصلآ يعتبرو صحاب بس مش أوى .. المهم يا شباب الى حصل كالاتى
على حب يربى كلاب فأشترى من يوسف الرشيدى الى كان غاوى كلاب وحمام وبيبيعهم كلبه ب 1000 جنيه .. على أكتشف ان الكلبه حامل ولانه جديد فى التربيه طلب من يوسف انه يخلى الكلبه عنده لغايه ما تولد والكلاب الى ها تتولد يكونو بالنصف
مرت الايام وعلى عرف ان كلبته جابت 10 كلاب ومش متأكد من الرقم ... المهم راح على ليوسف الرشيدى علشان يجيب منه الكلبه وولادها .. راح يوسف قاله انت مالكش عندى لا كلبه ولا حتى ولادها .. هنا على ما مسكش نفسه وراح جايب مطوه وأتخانق مع يوسف وعوره فى جنبه ودخل ييوسف المستشفى وراح على سلم نفسه للبوليس
المهم يوسف قالهم ان مش على الى ضربنى وساعتها على اتحبس شهر وخرج كان ساعتها يوسف خرج من المستشفى واول واحد راح يدور عليه كان على عشان ينتقم منه .. مالاقاش على لكن لقى واحد صاحبه وحبيبه وكان واد غلبان .. راح مسكه وضربه فى قلب الشارع وقلعه هدومه وركبه على موتوسيكل وفضل يلف بيه الشوارع ويقولهم انا مستنى على لما يخرج عشان اعمل فيه كده .. خرج على ولما عرف الى حصل من الناس راح لصاحبه واعتزرله وقاله ليك عليا أجيبلك رقبة يوسف ودى تكون حقك .. ساعتها على أستنى الفرصه وخرج فى يوم مع واحد صاحبه اسمه شريف بئلله لسوق الحمام والاتنين كانو غاويين حمام .. لما راح هناك بتوع الحمام اتصلو بيوسف الرشيدى وقالولو ان على فى السوق .. ساعتها يوسف راح هناك ومعاه كلبين وسيف .. او ما على شافو راح جرى على بيتهم وجاب فرد رش (( مسدس )) ودخل سوق الحمام وفضل يضرب رصاص فى الهوا ويقول انت فين يا يوسف يا رشيدى .. هنا غاويين الحمام قالولو ياعم انت ها تعمل نمره علينا ليه ما انت عارف فين بيته .. هنا على اتجنن من الكلمه دى وراح البيت عند يوسف ساعة صلاة الجمعه بالظبط واخد معاه كل اصحابه واخواته ومعاه سيف ومسدس
اول ما راح نده ليوسف على بيتهم وفضل يشتم .. اخوات يوسف حدفوه بالأزايز من شقتهم وفضل على وصحابه يحدفوهم بالطوب .. راح يوسف باعتلهم الكلب بتاعه علشان يعض على .. راح على ضرب الكلب بالرصاص وقتلو .. راح يوسف نازل الشارع ومعاه سيف هو وصحابه وبقت الخناقه بين الاتنين .. على كان عايز فرصه حلوه علشان يضرب يوسف الى كان معاه سيف والى ساعد على انه يضربه انه كان معاه صحابه الى كانو عماليين يلفو فى الشوارع .. لغايه ما على قدر فعلآ انه يوصل ليوسف ويضربه فى رقبته بالسيف ويموته فى لحظات وسط الناس وفى قلب الشارع وعند بيت على .. وبعد ما ضربه هاتسمعو صوت بيقول ارجع ارجع وساعتها على راح سلم نفسه فى القسم وقالهم انه قتل على
أما حكم النيابه الله أعلم بيه حت الأن بس بجد لما اعرف اتحكم عليه بأيه هقولكم

https://www.youtube.com/watch?v=dSDvERoVedg

الى لابس احمر وماسك سيف هو ده على أما الى أتضرب فاكيد يوسف الرشيدى .. والبنت
الى ماسكاه وبتسوط فدى اخته والى كان نايم جنبه وبيعيط عليه فهو أخوه والكلب الى كان نايم جنبه وبيلحس دمه هو ده سبب المشكله كلها
حقيقى عجبت لزمن يقتل فيه انسان بسبب كلب
والهدف مادي بحت